Isang napakalaking blessing ang pagdating ng isang sanggol sa buhay ng isang ina, kaya naman labis-labis ang tuwa ng aktres na si Meryll Soriano sa pagdating ng kanyang bagong baby ngayong 2021. Tuwang-tuwa din ang kanyang amang Wowowin TV host na si Willie Revillame.
Makikita sa mga larawan na ibinahagi ng aktres sa kanyang IG post na may caption na “With Lolo” na masaya ang kanyang ama habang karga-karga ang kanyang bagong apo.
Sa isang larawan naman ay hawak-hawak din ni Maricel Soriano ang baby ni Meryll, na makikita ang excitement at saya sa kanyang mukha. Sa post ni Meryll sa IG, “Surprise visit from Mommy 2. Pinakaunang bisita! We love you, Mommy 2”, pahayag ng aktres.
Samantala, marami naman ang nagtatanong kung sino ang ama ng bagong anak ni Meryll. Ayon sa mga ulat, nagkabalikan umano ang 38 taong gulang na aktres at ang kanyang dating showbiz boyfriend din na 34 taong gulang na si Joem Bascon.
Hindi rin ito itinatago ng aktres dahil makikita na naroon mismo si Joem sa mga larawan sa kanyang IG. “2021! May this year be kinder to us all. May we all find peace, joy and love. New year, new hopes, new positive outcomes.” Post pa ng aktres sa kanilang family picture.
Hindi umano inaasahan ng aktres na magbubunga pa ang naudlot nilang relasyon ni Joem, at darating ang isang malusog at cute na sanggol sa kanilang buhay. Matatandaan na nagkaroon ng long-term relationship ang actor kay Crisia Uy na umabot ng walong taon, ngunit naghiwalay din ito noong Nobyembre 2019.
Wala namang nabanggit na eksaktong petsa ng kanyang kapanganakan at ang kasarian at edad ng baby, ngunit makikita sa mga larawan na bagong panganak pa lang ito.
Isang magandang panimula ito sa buhay nila Meryll at Joem pati na rin sa mga lolo at lola ng kanilang bagong baby.
